沪语悦读：华生牌搭骆驼牌电扇(2)

休息天下半日，我又兜马路到南京路，看到第一百货商店橱窗前头聚拢了一群人，侪老有兴趣个看里向个物事。我迭个人喜欢轧闹猛，赶紧钻到人群里。原来橱窗里摆了一台电风扇，乌黑的烤漆铮光闪亮，正摇头晃脑个左旋右转着。橱窗里贴着一排醒目个大字：小骆驼跨进大上海。地浪还有一张折纸说明：已连续运转了多少多少天。我立刻想到的是：搿要浪费多少度电啊！

骆驼牌电扇？以前从来呒没听说过，搿是外地一家企业的牌子，我有眼不屑一顾。想起嫁妆中应该有台电扇，当然要买上海老牌子——华生牌，英文WS交错勒一道，像一朵鲜花焊勒网罩浪，盛开勒我的心里。可买华生牌电扇需要购物券，而骆驼牌电扇勿要购票券，有钞票就可以买。望着橱窗里搿台近在眼前的骆驼牌电扇，我心里犹豫着，有眼纠结。

回到屋里后，告诉了我阿姐，阿姐听后毫勿犹豫地讲：当然要买上海的牌子，用得放心。我担忧地说：华生电扇好是好，但要票子个呀。阿姐稍微想了一下，轻声讲：覅急，让小王想想办法。小王是阿姐的男朋友，当然就是我的毛脚姐夫，我心安理得个等勒拿购物券。