叫一声美女

原创 徐慧芬 海上梦叠
来源：新民晚报
作者：徐慧芬
沪语改写：边秦翌
文字修正：徐慧芬
讲述：顾敏
推荐：丁迪蒙
买小菜回转来个路浪向看到了迭能一幕。一个收废品个男人家，踏部黄鱼车，一边摇铃铛一边东张张西望望。迎面走过来一位大妈，手里捧仔一堆压扁脱个废个纸箱子。男个接过废纸，过了秤之后报了斤两，大妈讲，侬缺秤了，我勒勒屋里称过个。为了份量，两家头争起来了。争到最后，只听到伊个男个叫了声：美女哎，侬还缺搿几只角子个废纸钞票啊？就是搿能一声，大妈一记头就收了战牌，邪气爽气个讲了句，算了算了，挨下来呢，接过一把碎钞票，走脱了。

大妈个长相勿敢恭维，而且还趿好仔拖鞋，一身个裙衫是红红绿绿个，弹眼落睛呀。我想，就算按照老老普通个眼光来看，“美女”迭两个字好像搭伊个距离也蛮远个伐？看来，迭个男人家也是个高人，把握斤两勿单单用勒秤浪向，还用勒女人个心理浪向，真个算是哄人有一套个了。人，总归有得自家个软肋个，讲好听个闲话勿会得嫌比多个，现在，女人里向又有得几个人，可以拒绝人家甜蜜蜜送过来个“美女”搿能顶帽子呢？勒勒熟悉或者勿熟悉个环境当中，男士伊拉只要对牢仔女士，一声声美女叫勿停已经是见多勿怪了。就算是陌生人走了路浪向问路，请问美女，搿条路哪能介走啊？到店家里去买物事，指牢仔商品问销售：美女，迭个还可以打点折伐？甚至，连得女个搭仔女个之间也是搿能打招呼个。搿能介一来么，“美女”迭个称呼差勿多就变成功讨好女性个泛称了。
有趟，我姆妈问我，搿歇哪能看到小姑娘侪叫美女了呀？我讲拨伊听，啥地方只是小姑娘啊，搿歇连得外婆、阿奶也侪叫做资深美女了呀。姆妈叹口气讲，人人侪叫美女了，葛末真正个美女又叫啥个了呢？姆妈又讲，阿拉搿个辰光，讲到啥人是美女，葛伊个五官长相、身材肤色、举止仪态侪是有得公认个标准个，就算人家真个是美女，也只必过勒勒人家个背后头讲讲个，哪能会得当牢仔人家个面一口一声个喊伊美女个呀？再讲呶，真正个美女，肚皮里向还是要有点货色个，否则就是一只花瓶了。