叫一声美女(2)

所谓肚皮里向有货色，也就是讲迭个人是有内在个才华个。想起交关年数之前，我姆妈对子女就是搿能教育个。记得伊个辰光，我大阿弟十几岁，可以讲是个美少年，有趟伊从工厂学工回来，蛮开心个告诉姆妈，讲伊进车间之后，交关师傅侪围上来，讲伊长得漂亮，卖相好。姆妈稍微笑了笑，就收起笑容搭阿弟讲，长得好是侬自家个本事啊？勿是自家努力得来个物事，有啥个好得意个呢！挨下来，姆妈又讲：卖相再好，假使呒没其他个真本事，搿就是绣花枕头一包草，只有肚皮里有货色再对得起外表，再算是真个好看，懂伐？
差勿多个闲话，我爸爸也曾经讲过个。爸爸讲，人个外貌假使用十分来算个闲话，迭个人只有五分，但是，假使伊才华满腹，人家对迭个人个感觉就会得勒五分高头再加点分，因为内秀可以让人家忽视伊外貌浪个勿足；反过来，一个外表邪气漂亮个人，假使缺少内涵，葛末接触下来，人家对伊外表个感觉也会得打脱勿少折扣个。爸爸讲个闲话让我搭仔兄弟姊妹记到了老。
其实，就算是勒世风浮躁、喧闹，推销盛行，夸张无度个今朝，聪明人对“美”个定义心里向还是煞勒势清个。我认得几位长相勿俗，同时又邪气有才华个女子，事业浪个成就已经让人刮目相看，但伊拉并没停步，还勒努力精进，勿断个完善自家。我想，搿再是真正意义浪个美人伐？
记得几年之前看到过一档访谈节目，电视浪主持人对牢听众介绍讲，挨下来阿拉请迭位美女作家来谈谈……搿个辰光，只看到迭位长相秀美个女作家立起来鞠了一躬之后，轻轻叫个讲：谢谢，请勿要搿能介称呼我，我个写作搭仔性别没多少关系，搭外表更加呒没关联……
到了今朝，搿档节目个具体内容我已经忘记脱了，只有迭位女作家个搿段闲话，印象是老老深刻个。

作者：徐慧芬

朗读者：顾敏原标题：《叫一声美女》